Серија текстови од м-р Радојка Наумовска, член на ИО на ДОМ посветени на подигнување на свеста против родово базираното насилство.
Насилството започнува во моментот кога насилникот се чувствува загрозен – односно почнува да се плаши од губење на моќта и контролата. Бидејќи не е научен правилно да ги контролира емоциите како што се стравот, беспомошноста, срамот и вината, насилникот одлучува намерно да ѝ наштети на најблиската личност или поради која мисли дека настануваат овие недозволени чувства.
Ваквото нанесување штета може да биде во форма на навреди, лоши зборови, економски забрани/ограничувања или забрани за движење, емоционално условување, но и физичко казнување. Голем дел од ова однесување не се препознава како насилство во нашето општество, но е нормализирано и не се дискутира. Доколку се зборува за тоа, се разговара за можните постапки на жртвата кои довеле до казна, а срамот и одговорноста за насилството се пренесува од рана фаза на оние кои трпат насилство.
