Лидерите на Зелената партија ДОМ, Маја Морачанин и на ЛДП, Горан Милевски во Штип го претставија новото граѓанско движење на Центарот, со мотото „Излези од маглата“. Во своето обраќање пред големиот број штипјани, претседателката на ДОМ, Маја Морачанин нагласи дека ДОМ и ЛДП се прогресивни партии кои се отворени за сите граѓани, граѓански движења, експерти кои споделуваат слични вредности, за кои приоритет е јавниот , а не личниот интерес и кои сакаат да придонесат за здрав и квалитетен живот на граѓаните. Таа се осврна и на потребата од побрз одржлив развој на општина Штип, преку искористување на научните сознанија, иновациите и дигитализацијата. Нагласи дека мора да се употреби потенцијалот на ветерот и сонцето за производство на електрична енергија со поставување ветерници и фотоволтаици. Ја истакна и потребата за развој на бањскиот, рекреативниот и екотуризмот преку искористување на геотермалните води и промоција на природното и културното богатство во регионот. Во своето обраќање, лидерот на ЛДП, Горан Милевски рече дека Граѓанското движење на Центарот нуди нови визии за решавање на локалните проблеми и прашања во Штип и во другите места од регионот. Тој подвлече дека ЛДП и ДОМ не се согласуваат со предложениот Изборен законик кој не е во прилог на развој на демократијата, туку ги фаворизира интересите на големите партии. Пред штипјани се обратија и претседателите на општинските организации на ДОМ и на ЛДП во Штип, Ванчо Санев и Горан Варадинов, како и генералниот секретар на МОДОМ, Мартин Каровски.
