Сакаме да им дадеме сугестии на нашите колеги од политичките партии кои во понеделник ќе разговараат на т.н. наречена лидерска средба.
ДОМ предлага разговорите во Њујорк да се водат во 2 чекора. Прво да се побара во ООН да се потврди нашиот идентитет со што во графите за нацијата и јазикот да стои македонски. Како втор чекор да продолжат разговорите за разликите околу името, кои веруваме ќе се водат во многу порелаксиранa и поконструктивна атмосфера. За нас како ДОМ прифатлива е двојната формула, под услов да се договори пристојно име со кое Грција би ни се обраќала. СДСМ и нивните партнери веќе цела година јавно лицитираат со различни имиња на државата што тотално ја урна преговарачката позција на РМ. Токму затоа, на изборите граѓаните се откажаа од нив и ѝ дадоа масовна поддршка на опцијата која застана во одбрана на македонскиот идентитет. Гледаме дека за СДСМ е прифатливо секое име кое грчката страна го нуди. Тие како да не разбираат дека промената на името на државата повлекува промена во името на народот и јазикот, кои се елементи на идентитетот. Сите заедно треба да бидеме максимално одговорни. Секоја генерација има своја битка, а ова е нашата.
Прес конференцијата ја водеше претседателката Лилјана Поповска
Центар за информации и комуникации на ДОМ
Скопје, 03.10.2008
