Демократската обнова на Македонија - ДОМ по повод Денот на планетата Земја и лошото рангирање на Македонија на светската еколошката рејтинг листа ги повикува сите градоначалници, советници, невладини организации, политички партии и претставници на бизнис заедницата да ја поддржат Декларацијата за зелени општини

Декларацијата предлага заштеда на енергија, користење обновливи извори на енергија, отворање зелени работни места и зелени бизниси во општините, поддржува производство на органска храна.

 Сите потписници на оваа декларација се обврзуваат за решавање на проблемите со водоснабдувањето, третманот на отпадни води, преземање активни мерки против загадувањето на воздухот, водата, почвата, надминување на сообраќајниот хаос.

Во организација на ДОМ денеска на Плоштадот „Македонија“ се одржа Саем на зелени идеи. ДОМ, како партија на зелената опција, иницираше ваков настан за последниот ден на кампањата за Локалните избори 2009, за да им овозможи на граѓаните да ги дадат своите идеи за зелено Скопје и зелена Македонија. За таа цел на граѓаните им беше поделен флаер со место предвидено за нивни „зелени“ идеи и беа поставени зелени кутии во кои тие ги оставија своите предлози и ставови.

Во изјавата за медиумите претседателката на ДОМ Лилјана Поповска истакна дека ДОМ како партија на зелената опција во оваа кампања понуди своја Зелена програма, но сака да го слушне и мислењето на граѓаните какво Скопје сакаат и нивните идеи како да ги достави до идниот градоначалник на Скопје.

ДОМ излегува со осуда на вчерашните случувања од плоштадот Македонија.  Очекуваме надлежните органи да ги преземат сите неопходни мерки за откривање и казнување на сторителите на насилничките активности.

 ДОМ апелира до граѓаните, политичките и други субјекти да бидат свесни дека во овие моменти сите заедно носиме одговорност со своето однесување за иднината на државата. Затоа ДОМ апелира на разум и одговорност од сите.

 Времето на изборите не треба да се злоупотребува за отварање теми кои бараат поопсежни дебати за постигнување стручени и граѓански конзенсус. Веруваме дека  по завршувањето на изборите и по добивањето позитивен извештај од страна од домашната и меѓународната јавност ќе има доволно време да се договориме што и каде ќе се гради. Затоа е потребна мирна атмосфера, каде ќе бидеме ослободени од предизборен политички маркетинг.

 Треба и понатаму да се учиме на толеранција и почитување на различните ставови. Различните ставови не треба да бидат причина за меѓусебна омраза,  а уште помалку за казна или физичка пресметка.

Демократската обнова на Македонија – ДОМ во саботата во Холидеј ин ја промовираше својата Зелена програма со слоганот „Следи го зеленото“, прва зелена програма за локални избори во Македонија. Промоцијата на Зелената програма истовремено беше и одбележување на тригодишнината од постоењето на партијата.

„Македонската политичка сцена за првпат ја добива својата Зелена програма, како политичка платформа на зелената опција што ја застапува ДОМ. По тригодишно искуство како парламентарна партија и по поминати два изборни циклуса во 2006 и 2008 година, ДОМ за првпат се појавува на локални избори. За таа цел е подготвена изборна програма со приоритети, заложби и проекти, за чие исполнување ќе се залагаат нашите избрани претставници во локалната власт, но и сите ние што се стремиме кон зелена Македонија, европска Македонија, Македонија - наш дом, дом за сите“, рече од говорницата претседателката на партијата, Лилјана Поповска. Таа ја искажа решеноста партијата да истрае во оваа пионерска мисија за пробивање на прогресивни идеи во нашата земја, дел како стандарди што ни требаат на патот кон евроатлантските интеграции, а дел како визија за иднината. Искажувајќи го ставот дека „зелената опција значи поддршка за економскиот развој на земјата, но не по цена на нашето здравје и квалитет на живот“, Поповска истакна дека највлијателните земји и државници во светот веќе ја сместија зелената приказна и зелените работни места во своето политичко дејствување и потсети дека новиот американски претседател Обама најавува специјална програма за инвестирање во нови зелени работни места.

ДОМ на оваа прослава ги претстави и своите кандидати за советници за Град Скопје и за општина Центар, проф. д-р Антони Новотни и Насер Хот, од советничките листи на Коалицијата За подобра Македонија.